Musicanaescola

Banda Xuvenil de Santádega

Detalles: Creado o Sábado, 01 Febreiro 2020 23:19; Última actualización do Sábado, 01 Febreiro 2020 23:25; Publicado o Sábado, 01 Febreiro 2020 23:19; Escrito por Administrator; Visitas: 1063

O pasado verán, no mes de xullo, tivo lugar o IV Festival de Bandas Infantís e Xuvenís, organizado pola Federación de Bandas de Galicia, evento encamiñado a pór en valor o labor formativo destas agrupacións que moven, afortunadamente, cada vez a máis rapazada.

Por sorteo, da provincia de Ourense acudiron a Banda Xuvenil da Agrupación Musical da Limia e a Banda Xuvenil de Santádega (Coles). Como na capital da provincia levamos case seis anos sen banda municipal parécenos axeitado escoitar a unha destas bandas e darlles as grazas aos seus músicos, directores, asociacións culturais e nais e pais, por ofrecernos música fermosa, interpretada con agarimo e tamén por non deixar morrer esta tradición que vén desde finais do século XIX e que, debido á falta de sensibilidade da poboación ourensá e dos seus representantes políticos, foi borrada do acervo cultural da nosa cidade.

Con vostedes, a Banda Xuvenil de Santádega dirixida por Roberto Iglesias.

Andante - IV Trío Sonata BWV 528 - Bach

Detalles: Creado o Domingo, 19 Xaneiro 2020 12:41; Última actualización do Domingo, 19 Xaneiro 2020 12:41; Publicado o Domingo, 19 Xaneiro 2020 12:41; Escrito por Administrator; Visitas: 1603

As Sonatas en trío para órgano de J.S.Bach son un monumento á independencia melódica das voces e á imitación. Tecnicamente son moi complicadas para interpretar, pero amosan a mestría de Bach como grande compositor de todos os tempos.

Ofrecemos o Andante da Trío Sonata nº 4 BWV 528, un movemento que engaiola e que nunha primeira audición semellounos transportarnos a un mundo volátil, etéreo, máxico...

Versión de Ulf Norberg na igrexa Eleonora Hedvig de Estocolmo.

Agora a versión de Karolina Juodelyte no órgano Holy Cross Church Detmold en Alemaña. O tempo é un chisco máis lento.

E, para rematar, unha transcripción da obra para piano realizada por August Stradal. A magnífica interpretación é de Vikingur Ólafsson.

Sinfonía nº 7 - Beethoven - OSG - Dima Slobodeniouk

Detalles: Creado o Xoves, 02 Xaneiro 2020 13:40; Última actualización do Xoves, 02 Xaneiro 2020 13:42; Publicado o Xoves, 02 Xaneiro 2020 13:40; Escrito por Administrator; Visitas: 1553

Neste 2020 celebramos o 250 aniversario do nacemento dun dos mellores compositores universais: Beethoven. Para empezar a degustar de novo a súa música, propoñemos a audición da Sinfonía nº 7 en versión da OSG, unha orquesta da nosa terra, e a súa versión de 2017 con Dima Slobodeniouk como director, un músico excepcional dunha musicalidade e vitalidade extraordinarias que comunica moi ben aos seus músicos. As súas versións tennos engaiolados!

Felicitar á OSG pola calidade das grabacións na súa canle de Youtube.

El blog del lenguaje musical - María Quintanilla

Detalles: Creado o Martes, 31 Decembro 2019 10:50; Última actualización do Martes, 31 Decembro 2019 10:53; Publicado o Martes, 31 Decembro 2019 10:50; Escrito por Administrator; Visitas: 679

O blog de aula de María Quintanilla, El Blog de lenguaje musical, é un moi interesante lugar para coñecer o seu traballo e o do seu alumnado, os materiais que crea e as actividades nas que participa.

Eres tú - Juan Carlos Calderón

Detalles: Creado o Sábado, 28 Decembro 2019 18:10; Última actualización do Sábado, 28 Decembro 2019 18:26; Publicado o Sábado, 28 Decembro 2019 18:10; Escrito por Administrator; Visitas: 1347

Juan Carlos Calderón (1938-2012) foi un dos mellores compositores, arranxadores e produtores musicais de España. En 1973 compuxo a canción Eres tú, que o grupo Mocedades presentou ao Festival de Eurovisión. Aínda que non gañou, o tema, dada a súa calidade, é, aínda hoxe, un dos máis famosos internacionalmente cantados en castelán. Imos facer un repaso dalgunhas versións que se poden atopar na rede...

A versión orixinal de Mocedades, con audio restaurado dixitalmente:

Nun primeiro momento houbo unha reclamación por copia xa que o comezo da canción é semellante á canción que Xugoslavia presentou en 1966 tamén en Eurovisión titulada "Brez besed" (Sen palabras).