A Melodía Op 68 nº1 é unha das obriñas que se estudan ao enfrontarse por primeira vez coa música para piano de Schumann. Pertence ao seu Álbum para a xuventude.
O segundo movemento do Concerto para clave BWV 1058 de J.S.Bach posúe un engado especial.
Alterna un motivo rítmico obstinado no continuo coas diferentes aparicións do solista, que vai construíndo un discurso cada vez máis lírico. Todo isto é unha proba evidente do principio barroco do contraste.
Presentamos a versión para clave de Trevor Pinnock co English Concert
Aquí a versión para piano de Glenn Gould:
Claro que este concerto ten a súa versión para violín, ou ao revés, o de clave é unha versión do de violín. Escoitamos a Isaac Stern:
Moisés Quintas, mestre, músico, compositor, pedagogo musical, vén de publicar na Editorial Canela, un libro-disco, trilingüe, titulado Terra e Alma.
A publicación está centrada nos Alalás, eses cantos ancentrais homófonos, de temática amorosa en todos os sensos do termo, de ámbito melódico máis ben reducido, con variedade modal (maiores, menores, eclesiásticos...) e cunha melodía flexible ritmicamente, doce e con melancolía.
O libro consta dun estudo sobre o alalá cun interesante resume final e partituras das músicas interpretadas no disco adxunto. Con cada partitura ofrécese unha fermosa fotografía relacionada, realizada polo fotógrafo Carlos Valcárcel Gay.
No disco podemos disfrutar de gravacións instrumentais (guitarra, zanfona, gaita, frautas traveseiras, ocarina, pitos de cana e de buxo, frautas de óso e caramela...) de 28 alalás tradicionais recollidos ou compostos por diversos autores, mesturados con sons da terra (chuvia, carro, campás, paxaros, río, sons propios de traballos agrícolas tradicionais...).
Consideramos este novo traballo de Moisés un gran acerto. Por un lado está a idea de relacionar cada alalá cunha fotografía evocadora ou relacionada; por outro, a escolla do branco e negro, que potencia o carácter ancestral; e, por último, a fusión dos sons variados da paisaxe galega coas interpretacións musicais. Tamén temos que salientar a musicalidade das interpretacións, que potencia o carácter sinxelo desta música, pero dunha calidade artística extraordinaria, e que consigue equiparar a expresividade da melodía instrumental á que é propia da voz humana.
Música, son e imaxe que saen da terra e da alma do noso pobo.
Unha pequena mostra:
Hoxe, 24 de febreiro, conmemoramos o Día de Rosalía de Castro. Tal día coma hoxe, hai 181 anos, naceu en Santiago a nosa poeta máis internacional, unha das figuras do Rexurdimento. Coa súa obra, o galego viu a luz, saíu deses Séculos Escuros, e volveu ser unha lingua con produción literaria de gran calidade.
Como contribución nosa a esta conmemoración, propoñemos a escoita de "Campanas de Bastabales", do compositor ourensán Angel Barja, en interpretación da Coral de Ruada dirixida por X.X. Rumbao. Este vídeo é a única mostra que puidemos atopar. Feliz Día de Rosalía.
Yuki Kondo e Kayo Konishi compuxeron Lillium para a serie Elfen Lied, que aparece na intro de cada capítulo. As autoras tomaron textos da Biblia en latín e fixeron unha especie de canto gregoriano modernizado (tonal, sen melismas, con acompañamento musical...) harmonizado ao xeito de Rachmaninof e conseguiron un tema fermoso con moita nostalxia. Aquí teñen dúas versións:
A caixa de música da protagonista toca esta melodía así:
Unha fermosa versión para coro e órgano:
